إيه هيه أسماء المحاكم وإختصاصاتها؟

المحاكم ليها أكتر من نوع عشان تحكم فى موضوع معين لكن عقوبة السجن أو الحبس مبتصدرشى إلا من تلات محاكم وهيه :-

محكمة الجنح / ودى محكمة بتحكم فى القضايا اللى العقوبة فيها الحبس لحد تلات سنين أو الغرامة وإسمها قضايا "الجنح" والحكم بيطلع من قاضى واحد وفى كل قسم أو مركز شرطة ليها محكمة " محكمة جنح" .ومش لازم المتهم يحضر بنفسه ممكن محامى يحضر عنه بتوكيل وممكن المتهم يطعن على الحكم ويوقف تنفيذ الحبس أو العقوبة مؤقتا اللى صدرت من محكمة الجنح لحد ما المحكمة اللى حيستأنف المتهم الحكم قدامها تحكم و اسمها محكمة الجنح المستأنفة وهيه مكونة من تلات قضاة وممكن المتهم يطعن كمان على الحكم اللى يطلع من محكمة الجنح المستأنفة قدام محكمة اسمها محكمة النقض لكن الطعن قدام محكمة النقض مش حيوقف تنفيذ الحبس أو العقوبة الأحكام اللى بتطلع بالسجن اكتر من تلات سنين بتطلع من محكمة إسمها محكمة الجنايات .

محكمة الجنايات / ودى محكمة موجودة فى كل محافظة تقريبا ودى محكمة بتحكم فى القضايا اللى الحكم فيها أكتر من تلات سنين سجن لحد الإعدام وإسمها قضايا الجنايات وبتكون مشكلة من تلات مستشارين ولازم المتهم بنفسه يحضر الجلسة مينفعشى يحضر محامى بتوكيل بس لازم المتهم يكون معاه وبمجرد ما بيطلع الحكم بالسجن المتهم بينفذ العقوبة ما عدا حكم الإعدام ومفيش استئناف لأحكام محكمة الجنايات لكن طبعا فى نقض لأحكامها بس مبتوقفشى السجن أو العقوبة لحد ما تحكم محكمة النقض .

محكمة أمن الدولة العليا طوارىء والمحكمة العسكرية وده بيسموه قضاء " استثنائى " لأنها منشأة بموجب قانون الطوارىء ونظامها زى محكمة الجنايات بس احكامها نهائية مينفعشى نطعن على أحكامها فى محكمة النقض وكمان لو المحكمة عطت المتهم براءة ممكن الحاكم العسكرى وهوه رئيس الجمهورية يعترض على حكم البراءة ويطلب إعادة محاكمة المتهم من تانى .